Los “Engleses” a La Guépia a l’Edat Mitjana
Los “Engleses” dins lo ròdol de La Guépia
Pendent unas decenias al sègle XIV, La Guépie e son ròdol son al còr de la guèrra de Cents Ans e cambia d’unes còps de rei. Aquesta situacion a per origina dos sègles abans, lo marridatge d’Alienor, duquessa d’Aquitània e mai importanta senhora dels paises occitans, amb lo rei d’Anglatèrra Enric II.
Aquestes tròces son extraches de l’Operacion Al Canton, Sent-Antonin de La Guépia a Casals…, Daniel Loddo & Cristian-Pèire Bedèl, GEMP/ALCOC, 1992
Tre 1345 Sent Antonin se dona als Anglés, que i tornaràn encara en 1352 e 1354, abans que la vila lor siaga balhada pel rei de França amb tot lo Roergue, en 1362. Jean Chandos (lo conestable d’Aquitània, representent del rei d’Anglatèrra) venguèt en persona jurar de « tener e guardar las franquezas e lhas lhibertats de la viala de Sent-Antonin ».
Los cossols de Milhan mandan en març 1353 d’òmes d’armas al sèti de Sent-Antonin e al més de junh lor fornissan l’equipament :
« Essegon si aquels que partiron d’Amilhau per anar al seti pauzat davan la vila de S(ent) Antoni, en la senescallia de Rozergue, preza e occupada per la part des Engles enemixs de nostre senhor lo Rey de Fransa, per mossenher lo Compte d’Armanhac, luoctenent de nostre senhor lo Rey de Fransa en las partidas de la lenga d’Oc, et era estat cridat publicamen que totas comunias de Rozergue venguesson am armas al dig asseti de S(ent) Antoni per cobrar ladicha vila al Rey nostre senhor ».
Las comptas consularias de ciutat de Rodés fan ecò dels eveniments de 1354.
« Bailem plus, lo sapde davan la Totz S(ents), que fol o darrièr dia del mes de octobre, a P.D., per una garnizo quelh avia mesa Moss(enher) W. Nebles, per los adarairachgues que demandava, can fo capitani de Sieutat, que era pres S(ent) Antoni , escut per… »
« Bailem plus ad Huc Galtier, a XX dias de may, quel eviavo los senhors vas S(ent) Antoni, per portar letras a la part de lains… »
Aqueles memas cossols rutenas s’inquiètan de la presencia dels Engleses en 1358-1359 :
« It(em), a Vezia Montes et a Huc Barrieyra que foro tramezes per los senhors cossol de Cieutat e de Borc, lo dia de S(ent) Guirgori, al Puech de la Roqua e a S(ent) Antoni et a Vilfranca per espiar e per saber dels Engles on era i que fazien, e bayliey lor per nosta part… »
E en 1368-1369, al moment de tornar de Roergue al rei de França, manifestan la mema inquietud :
« It(em) lo XX jorn de julh, una spia a S(ent) Antoni e a Caortz per saber de Moss(eher) Joh. Sandos, ont era ni se venia…”
En 1381 e 1388 los « rotiers Engles » son encara a La Guépia e a Peg Rodil.
Imatge : The death of Sir John Chandos at Lussac. Paris, Virgil (illuminator); c. 1410